Annotasiya
“Ölüm qədər asan” (ingiliscə “Dead Simple”) – Hər şey kiçik bir zarafatla başlayır. Maykl Harrisonun subaylıq həyatı ilə vida mərasiminə yığışan dostları səbəbkarı sərxoş halda tabutun içərisinə qoyub basdırırlar. Bu zarafat gənclərə baha başa gəlir: gələcək bəy itir, dostlar isə yol qəzasında həlak olur. Xəfiyyə Roy Qreys cinayət işini araşdırmağa başlayır.
Karandaşın izi ilə
Nizam-intizam güc və əminlik verir. Əminlik irəliyə baxmağa imkan yaradır. İrəliyə baxanda qarşında üfüq açılır. Üfüqü görəndə isə sakitləşirsən.
***
Biz imkanlarımız səviyyəsinə qalxmırıq, biz bəhanələrimiz səviyyəsinə enirik.
***
Həyat həmişə bir neçə fraqmenti çatışmayan pazzlı xatırladırdı. Özü də əhəmiyyətli fraqmentləri.
***
– Bu yaxınlarda gör nə oxumuşam. Fransızlar ingilislərdən daha çox qırmızı şərab içir, ancaq çox yaşayır. Yaponlar ingilislərdən daha çox balıq yeyir, amma daha çox yaşayır. Almanlar ingilislərdən daha çox təzə ət yeyib, pivə içirlər, ancaq yenə də çox yaşayırlar. Bilirsən, əsas məsələ nədir?
– Yox.
– Fərqi yoxdur, nə yeyib içirsən. Bizi öldürən ingilis dilində danışmağımızdır.
***
Qəlb yarası isə sağalmırdı: köhnə patefon iynəsi kimi elə hey fırlanır, çevrə boyu izi dərinləşdirirdi.
Tərcümə: Lamiyə Göycəyeva
